Таму згаданая аўдыторыя зноў займела магчымасць трапіць на добры канцэрт. На сёлетнім, чацвёртым па ліку, фестывалі беларускамоўнай музыкі Men’s Fest прынялі ўдзел берасцейскі Pirouette!, Akute з Магілёва, Паліна Рэспубліка з Мінска, Ilo&Friends з Беластоку, а таксама луцкі гурт “Фіолет” (Украіна). Большасць выканаўцаў ужо знаёмая берасцейцам, упершыню наш горад наведалі толькі маладая спявачка-бард Паліна Рэспубліка і Ilo&Friends. Зрэшты ў наш электронны час назваць іх незнаёмымі ўсё адно язык не павернецца. Паліна, аднойчы з’явіўшыся на небасхіле, прывяла проста ў захапленне музычных крытыкаў і аматараў аўтарскай песні, таму гэтае імя ўжо гады паўтара як не сыходзіць з вуснаў абазнанай публікі. Ды і Ілону Карпюк, беларускую дзяўчыну з Падляшша, актывістку “Звязу беларускай моладзі” наш народ ведае калі не па яе калектыве, то прынамсі па “Басовішчы”.

cms-image-000008355.jpg

Акцэнт на беларускамоўнасці зусім не азначае, што на фэсце не гучалі іншыя мовы. Pirouette! утульней сябе адчувае ў расейскай, а нацыяналістам з “Фіолету” сам бог загадаў спяваць на ўкраінскай, што аніяк не перашкодзіла гурту лепш за ўсіх раскачагарыць брэсцкую публіку. Трэба адзначыць, што фронтмэн “Фіолету” Сяргей Мартынюк з вялікай сімпатыяй ставіцца таксама і да мовы беларусаў. На гэты раз ён не толькі выступіў на ёй з досыць доўгім вітаннем, але і праспяваў дзве песні. Адну з іх – у дуэце з Палінай Рэспублікай.

Прыемна, што вялікі працэнт наведвальнікаў канцэрта склалі 15-18 гадовыя юнакі і дзяўчынкі, якія сваім прыходам выказалі адназначную цікавасць да беларускамоўнай музыкі. Магчыма, гэта добры знак, што сітуацыя з мовай у Брэсце калісьці ўсё ж палепшыцца.

cms-image-000008356.jpg

А ўвогуле, калі зайшла гаворка пра публіку, людзей на канцэрт магло б прыйсці і больш. Гэта пры тым што спрактыкаваныя арганізатары і так зрабілі праграму максімальна канцэнтраванай, каб зацікавіць розную аўдыторыю. Гэта недзе нават пашкодзіла канцэрту – на ўсё пра ўсё было 4 гадзіны часу, і калектывы проста не паспявалі як след адыграць свае сесіі. Паспешнасць адбілася і на праанансаваных джым-сесіях. Замест трох музычных імправізацый прайшла толькі адна.

А каб у арганізатараў было менш шансаў “уляцець на грошы”, усё магло б быць інакш.

 Іна ХОМІЧ  (фота аўтара)