Збольшага былі мясцовыя, але даехалі следам з Брэста і ваколіцаў (прыкладам, з Жабінкі). “Заўсёды ездзім, нават куды далей, у Мінск, звычайна”, — заўважыў адзін з сівых ужо дзядзькаў.

cms-image-000010075.jpg

 Канцэрт у “Пружанскім палацыку”.

Што ж, гэтаму можна пазайздросціць. Як-ніяк, гурт “в деле” яшчэ з 1990-га года. Як можна пазайздросціць і працаздольнасці музыкаў: першае аддзяленне — гадзіна дваццаць хвілін, дзесьці столькі сама і другое. Плюс песні “на біс” на просьбу заўзятараў, так што ў канцы лідар гурта Уладзімір Серафімаў лыкаў морс проста перад гледачамі. Эксклюзіўна для нашай газеты ён паведаміў, што канцэрт у Пружанах адбыўся па запрашэнні тутэйшых сяброў і падчас выступу было некалькі песень з новага альбома. “Рэкламаваць яго не хачу. Скажу толькі, што ён практычна гатовы. Выкладзем яго адразу ў Інтэрнэт, як толькі адшліфуем дэталі. Выкладзем цалкам, а не так, як папярэдні, — у розных аранжыроўках”, — зазначыў Серафімаў.

У Пружанах “САДЪ” выступіў у поўным складзе (вакал+гітара, бубны, бас-гітара, акардэон, скрыпка). Лідар гурта падкрэсліў, што са скрыпкай  вырашылася канчаткова: “Мы Наташай Руцкай цалкам задаволены. Прыцірка закончылася, і яна знайшла сваё месца ў нас, замацавалася”.

cms-image-000010076.jpg

Лідар  гурта “САДЪ” Уладзімір Серафімаў.

Сама скрыпачка кажа, што хоць не іграе ўсе песні (гэта нармальна — яны ж рознахарактарныя) і не мае пакуль “фірмовай сольнай”, але сякія-такія яе ідэі былі прыняты, і яна супрацай надта задаволена: “Я нават ад дзіцяці свайго гадавалага, бывала, ездзіла з гуртом — так прыпала адно да аднаго, так праца пайшла”. Але супрацоўнічае Наташа і ў іншых праектах: яна назвала  кавер-гурт  BIG STYLE BAND  і “Сьцяну” (“у нас гэта не табу — іншыя таксама робяць”).

Акрамя традыцыйнай мовы, “САДЪ” спяваў у Пружанах па-ўкраінску і нават, здаецца, па-беларуску. Але, можа быць, гэта мне проста падалося пасля папярэджання Уладзіміра Серафімава пра тое, што яго ўкраінская мова “не надта каб вельмі”.

cms-image-000010077.jpg

Скрыпачка гурта Наталля Руцкая.

Публіка, парогава падзеленая, дарэчы, на “ну надта олд стараў” і  амаль шкаляроў, атрымлівала ад творчасці брэсцкіх рокераў станоўчыя эмоцыі. Гук, як на такую невялікую гасцёўню, дык аж надта, манера нязвыклая, канцэрт жывы… Што яшчэ трэба?! Ну, а што гітарныя рыфы гучаць класічна ці музейна — дык маладыя ж не чулі ні “Блэк Сабат”, ні “Лэд Зэпелін”, ні “Дып Пепл”. Так што танчылі ўсе разам.

У Брэсце гурт мае выступіць 22 лютага ў “Рок-кавярні” на Вульцы.

 Яўген БЯЛАСІН (фота аўтара)