Там 38-гадовы былы лідар “Маладога фронту”, сустаршыня ўтвараемай партыі Беларуская Хрысціянская Дэмакратыя за пратэсты на Плошчы часу прэзідэнцкіх выбараў 2010 года адбываў сваё трохгадовае пакаранне на папраўчых працах (Павел мусіў выконваць іх на складзе аўтатрактарных запчастак). “Цягаў у якасці грузчыка плугі, рысоры, карданныя валы, усялякае жалеззе… Прыязджалі па запчасткі механізатары, галоўныя інжынеры, кіраўнікі прадпрыемстваў з усяго Пружанскага раёна, і  так, не маючы магчымасці вольна перамяшчацца па Пружаншчыне, я пазнаёміўся з сотнямі лепшых людзей гэтага краю. З гэтых кантактаў убачыў галоўную адрознівальную рысу нашых людзей  ад “шырокіх, добра было б звузіць” расейцаў, а менавіта глыбіню гэтых яскравых  беларусаў, — тлумачыць пра вытокі бачання загалоўнай рысы палітык праз год пасля вызвалення з “хіміі”. — Турэмныя пуцявіны зводзілі мяне  з генераламі, з мільянерамі, з “капітанамі вытворчасці”, з топ-менеджарамі прыватных фірм, у якіх у аднаго забралі 70 тысяч долараў, у другога самалёт, — маўляў, не змог давесці, за якія грошы набыў…” — пералічваў Севярынец аб’ём чалавечага вымярэння,  якое забяспечвала  заяўленую глыбіню.

Яшчэ адной крыніцай пазнання глыбіні з’явілася акармленне вязня ў мясцовай праваслаўнай царкве, дзе беларуская мова гучыць не з перапуду. “Штонядзелі мяне туды вазілі  па чарзе мясцовыя вернікі, аднапартыйцы,  аднадумцы. Да провадаў на цягнік у Жабінцы, калі вызвалілі і ехаў дахаты, назбіралася са сто тэлефонаў і адрасоў”, — паведаміў пра свой капітал былы сядзелец. Дэклараваную глыбіню дарэчна падкрэслівае  малюнак на вокладцы кнігі: затканая павуціннем  студня, у якой дрэвы адбіваюцца так,  каб калі яны раслі вершалінамі ўглыб вады.

cms-image-000015520.jpg

Для мяне асабіста адметным падаецца назіранне, што аўтар, выпускнік геаграфічнага факультэта Белдзяржуніверсітэта, які пісаў пра карысныя выкапні, багацці беларускіх нетраў (што раўналежна глыбіням), — усё больш заглыбляецца ў чалавечае вымярэнне. Натуральна, адметнай падаецца і стомленасць металу ўлады. Бо сем гадоў таму назад у Брэсце на прэзентацыі кнігі Севярынца “Лісты з лесу”, напісанай у месцах ягонага першага абмежавання волі,  “павязалі” і засудзілі за несанкцыянаваны сход каля 30 чалавек (сярод іх і аўтара гэтых радкоў), а былога вязня тады пасадзілі на 15 сутак. З таго часу ва ўладаў, падобна, дадалося глуздоў, Павел памужнеў, а чытачоў яму прырасло бадай што на парадкі больш …

Кніга “Беларуская глыбіня” складаецца з 84 эсэ. Выйшла сёлета накладам у 500 асобнікаў у выдавецтве “Логвінаў”. Ужо паступіла ў продаж. Даступная таксама ў інтэрнэт-кнігарнях. Выдавец, пры ўмове паступлення грошай за наяўны наклад, абяцае  ажыццявіць давыданне яшчэ ста асобнікаў.

cms-image-000015521.jpg

Для сённяшняй  Беларусі наклад не самы малы. Але лёс маладога верніка ў Беларусі, які паспеў пасядзець за свае перакананні і ва ўсходняй (Малое Сітна Полацкага раёна), і ў заходняй яе частцы (Куплін), можа быць зарукай, што яму назбіралася што сказаць людзям і што ягоны наробак яны не абыйдуць увагай.

Што да брэсцкай прэзентацыі, то яна сабрала некалькі дзясяткаў адмыслова запрошаных гасцей і журналістаў. Прайшла ў добрым гуморы – гамана часта перамяжалася здаровым і аптымістычным смехам.  Прысутныя даведаліся, што гэта была адна з шэрагу сустрэч палітычнага географа і людазнаўцы з чытачамі, і геаграфія гэтых сустрэч — уся Беларусь.