Страсці па рыбе

Жывая рыба, якую прывозяць з рыбгасаў, заўсёды карысталася папулярнасцю ў спажыўцоў. Што ўжо казаць пра перыяд паста, калі яна з’яўляецца адзіным “мясам” на стале, прычым адносна танным?

Рэгіна Мікалаеўна і яе суседзі ўжо прывыклі, што прыкладна раз на тыдзень машына з жывой рыбай прыязджае да бліжэйшага магазіна па вуліцы Жукава. “Рыбу вельмі хутка раскупляюць,– распавядае чытачка.– У нашых дамах жыве шмат пенсіянераў, якім  цяжка ехаць за прадуктамі ў цэнтр горада, і такі вулічны гандаль усіх вельмі задавальняе”.

Абрадаваліся жыхары вуліцы з’яўленню машыны з рыбай і ў мінулы аўторак. Аднак толькі высыпалі з дамоў, як даведаліся, што ніякага гандлю не  будзе па забароне магазіна.  Рэгіна Мікалаеўна не можа зразумець, чаму магазін не пайшоў насустрач гандлярам рыбай. “Я разумею, каб там былі нейкія канкурэнты. Але ж у магазіне не прадаецца рыба”,– гаворыць яна.

Прасвятліць рыбную сітуацыю мы папрасілі загадчыка магазіна №16 фірмы “Продтовары” Алену Борсук. Справа аказалася сапраўды не ў канкурэнцыі, а ўсяго толькі ў правілах вулічнага гандлю. Згодна з імі, магазін пускае на сваю тэрыторыю толькі тых рэалізатараў, якія маюць пісьмовы дазвол з гарвыканкама на продаж тавараў. Дагэтуль прадстаўнікі рыбгаса такі дазвол прад’яўлялі, таму кіраўніцтва магазіна да іх ніякіх прэтэнзій не мела. На гэты раз дазвол аказаўся пратэрмінаваным. Вось і засталіся з носам як самі прадаўцы, так і іх пастаянныя пакупнікі.

Будаўнічыя рэбусы

Ганна Паўлаўна жыве ў доме, злітым з іншым такім жа домам – нумаруюцца яны 60 і 60/1. Прычым нумарацыя ідзе не злева направа, а наадварот, што ўсе 30 гадоў эксплуатацыі будынка выклікае блытаніну. Жанчыне незразумела, які сэнс быў размяжоўваць адзін будынак на два будаўнічыя аб’екты, а таксама ёй цікава, ці можна гэты парадак рэчаў змяніць.

Высветліць, чым аб’ектыўна выклікана дзіўная нумарацыя, мы не змаглі нават у Брэсцкім агенцтве па дзяржаўнай рэгістрацыі і зямельным кадастры. Часцей за ўсё падобным чынам раздзяляюцца асобныя кааператывы, але ў выпадку з домам нашай чытачкі гэтае тлумачэнне не падыходзіць, паколькі дом завадскі. Увогуле, намесніка дырэктара Аляксандра Фаруціна сітуацыя асабліва не здзіўляе: “Магло быць усякае, яшчэ і не з такім прыходзіцца сутыкацца. Справа ў тым, што мы адносна нядаўна сталі цалкам займацца пытаннямі нумарацыі. Да гэтага нумараваў хто хацеў і як хацеў”. Асаблівай праблемы ў тым, каб зліць два дамы ў адзін, службовец не бачыць, але ўзнікае пытанне, ці захочуць гэта рабіць самі жыхары: “Працэдура зліцця дамоў існуе, аднак новы праект будзе каштаваць грошай. Калі жыхары гэтых дамоў згодныя плаціць, то калі ласка”, – зазначае Фаруцін. Варта жыхарам спараных дамоў памятаць і пра тое, што ў выпадку гэтага фармальнага перайначання памяняецца адрас іх рэгістрацыі, што зноў жа выкліча пэўныя фінансавыя страты. Відаць, танней ім усё ж будзе і далей правяраць сваю пошту ў скрынях суседзяў.

З Чэрняў на сваіх дваіх

Жыхарку в. Чэрні Таццяну хвалюе транспартнае пытанне. Многія жыхары вёскі працуюць у абласным цэнтры, і раніцай, калі ўсім адначасова трэба дабірацца на працу, узнікаюць пэўныя праблемы: “Адна маршрутка “сямёрка” не можа ўсіх вывезці. Ёсць яшчэ маршрутнае таксі №17, але машыны часта проста не выходзяць на маршрут. Раней нас ратаваў прыгарадны аўтобус №221, які ў 7.10 адпраўляўся з Чэрняў, але недзе з сярэдзіны лістапада ён кардынальна змяніў маршрут, удвая падаражэў і ў выніку ходзіць пусты. Калі ёсць уласны транспарт, то яшчэ паўбяды. Я ж пастаянна спазняюся на працу”.

Транспартную сітуацыю каментуе начальнік эканамічнага аддзела Брэсцкага райвыканкама Міхаіл Дацэнка: “За апошнія гады было шмат розных эксперыментаў. Так, у Чэрні хадзіў гарадскі аўтобус №13, але аўтобусны парк, спасылаючыся на Закон “Пра аўтамабільны транспарт і аўтамабільныя перавозкі”, урэзаў яго. Былі маршруты, што адпраўляліся ад Брэсцкага аўтавакзала, толькі яны не карысталіся попытам у людзей. Тарыфы на праезд у іх вышэйшыя, чым на праезд у гарадскім транспарце. Дарэчы, па звестках аўтавакзала, 221-ы маршрут таксама стратны, хоць праверыць гэта мы не можам. У бліжэйшы час мы зноў будзем збірацца з прадстаўнікамі аблвыканкама, Брэсцкага аўтапарка і аблгартранса і спрабаваць нешта вырашыць”.

Такім чынам, вырашэнне транспартнай праблемы для жыхароў Чэрняў пакуль застаецца туманным, хоць і небезнадзейным. А можна ж проста аднавіць першапачатковы маршрут 221-га аўтобуса, які, можа, і не быў цалкам рэнтабельным, але адназначна больш запатрабаваным, чым цяперашні.