Перад канцэртам з 16.30 будзе працаваць выстава, прысвечаная беларускай дудзе, падчас якой Зміцер Сасноўскі, заснавальнік і мастацкі кіраўнік “Старога Ольсы”, раскажа пра свой уласны інструмент і нават пакажа, як ім правільна карыстацца.

Напярэдадні канцэрта мы звязаліся са Зміцерам і пацікавіліся некаторымі закуліснымі момантамі дзейнасці “Старога Ольсы”.

Супраца

— Скажыце, Зміцер, гурт дазваляе сабе выступаць без папярэдніх рэпетыцый?

— Зрэдку перад канцэртамі мы не рэпетуем, бо ў нас па добрай завядзёнцы шмат іншых рэпетыцый. Але звычайна перад кожным канцэртам праходзімся па складаных кампазіцыях – абнаўляем у памяці тэхніку выканання.

— Якім быў самы доўгі перыяд без рэпетыцый і збораў?

— 2 месяцы, калі ў некалькіх удзельнікаў нарадзіліся дзеці.

— У Вас як у кіраўніка ёсць штрафныя санкцыі для прагульшчыкаў?

— Мы даўно спрацаваліся, жывем як сям’я. Штрафы ёсць, але карыстаемся імі рэдка, бо ў нас амаль ніхто нават не спазняецца на рэпетыцыі, не кажучы ўжо пра прагулы.

Стыль

— Ці любіць калектыў пераапранацца? Гаворка ідзе пра камплекты касцюмаў.

— У нас тры камплекты вопраткі адпаведна пэўным перыядам гісторыі – ранняя сярэднявечная (крывіцка-балцкая архаіка), сярэднявечная і рэнесансная. Вядома, найбольш сукенак у нашай флейтысткі Машы.

— Апрануцца па модзе сярэднявечча – дарагое задавальненне?

— Пашыць такі строй у Беларусі каштуе прыблізна 200 долараў. З нашых самы дарагі набор – гэта рэнесансны, для яго мы выкарысталі, адпаведна модзе тых часоў, італьянскія тканіны.

— Як жа выпрацоўваўся сучасны выгляд гурта? Да дызайнераў не даводзілася звяртацца?

— Не, да дызайнераў не звярталіся. Выпрацоўвалі стылістыку разам, корпаліся па кнігах ды раіліся з гісторыкамі, якія спецыялізуюцца на старадаўніх касцюмах.

Творчасць

— Наколькі аўтэнтычныя тыя музычныя інструменты, якімі карыстаюцца ўдзельнікі “Старога Ольсы”?

— Інструменты робяцца па магчымасці найбліжэй да гістарычных ілюстрацыйных матэрыялаў. Скажу больш: у многіх гуртах, якія выкарыстоўваюць дуду (валынку), падстройка асобных гукавых адтулін адбываецца з дапамогай скотча, мы ж прынцыпова карыстаемся толькі воскам.

— У чым асабіста Вы бачыце найбольшую карысць ад “Старога Ольсы” для беларускай культуры?

— Людзі пасля канцэртаў дзякуюць за тое, што мы выклікаем патрыятычныя пачуцці і гонар за нашую гісторыю. У гэтым і ёсць найбольшая карысць, я думаю.

На канцэрце 27 студзеня “Стары Ольса” абяцае аддаць перавагу так званаму “Полацкаму сшытку” – беларускай музыцы эпохі барока. Хоць, у прынцыпе, не так і важна, што менавіта будуць граць абодва гурты. З такой рэпутацыяй і паслужным спісам, якія яны маюць, сумнявацца ў тым, што будзе цікава, не прыходзіцца.