З гэтай нагоды ў абласной бібліятэцы імя М. Горкага адкрылася кніжная выстава “Беларусь – яго калыска”. Найбольшае месца ў экспазіцыі займаюць творы аўтара на мове арыгінала, прычым як белетрыстычныя, так і навуковыя. Нават прытым, што кнігі занялі 3 паліцы, гэта толькі вяршыня айсберга пісьменніцкай творчасці Юзафа Ігнацыя. За свае 75 год ён паспеў напісаць ажно 600 тамоў сачыненняў, з іх 223 раманы і аповесці. Праз сваю пладавітасць ён нават трапіў у кнігу рэкордаў Гінэса.

Побач з арыгінальнымі творамі бібліятэкары прапануюць звярнуць увагу на пераклады. Адразу заўважна, што беларусы пакуль перакладаюць Крашэўскага мала, ад гэтага мала яго і ведаюць. Рускіх перакладаў проста ў разы больш за беларускіх. І гэта не толькі на дадзенай выставе. У Расіі Юзаф Крашэўскі ўжо даўно амаль цалкам перакладзены, у нас жа перастваральнікі дабраліся пакуль да асобных твораў.

Вельмі лагічна на выставе выглядае частка эпісталярнай спадчыны польскага пісьменніка, а таксама разнастайная інфармацыя пра яго жыццёвы лёс і творчасць. Энцыклапедыі ўвогуле займаюць асобны стэлаж. Загадчык аддзела краязнаўчай літаратуры і бібліяграфіі Таццяна Кавенька тлумачыць, што аўтары выставы адмыслова паклалі перад чытачамі так шмат даведачнай літаратуры. Гэтым бібліятэкары хацелі падкрэсліць гістарычную значнасць асобы Крашэўскага.

На адкрыцці выставы “Беларусь – яго калыска” намеснік дырэктара бібліятэкі Ала Мяснянкіна заадно прэзентавала праект “Віртуальная рэканструкцыя спадчыны Юзафа Ігнацыя Крашэўскага”, над якім ужо паўгода вядуць працу не толькі нашы бібліятэкары, але і спецыялісты з Бялападляскай і Ровенскай бібліятэк, а таксама музейныя работнікі трох краін.

Свой унёсак у святкаванне дня нараджэння Крашэўскага ўнеслі і госці выставы.

cms-image-000004548.jpg

Загадчык кафедры класічнай і замежнай філалогіі Брэсцкага дзяржаўнага ўніверсітэта імя А.С. Пушкіна Алена Ківака прымусіла задумацца пра фенаменальнасць асобы і творчасці юбіляра. Падалося, напрыклад, цікавым, што гэта быў адзін з нямногіх на той час творцаў, які жыў з ганарараў за літаратурныя публікацыі. Гэтым і тлумачыцца іх, з аднаго боку, вялізная колькасць, і, з другога, неадшліфаванасць.

А загадчык кафедры тэорыі і гісторыі рускай літаратуры таго ж універсітэта Таццяна Сянькевіч завастрыла ўвагу на гістарычнай прозе, прызнаным майстарам якой быў Юзаф Ігнацы. Яна заўважыла, што пісьменнік з’яўляецца выдатным апісальнікам, і праз тое выклікае вялікі давер нават сучаснага чытача.

Мастацтвазнаўца Аркадзь Дзянісевіч расказаў пра героя выставы са сваёй званіцы.

cms-image-000004549.jpg

Пра Крашэўскага-мастака пойдзе гаворка і ў яго кнізе, якая ўжо здадзена ў набор. Але ці пабачыць свет яна яшчэ сёлета, Аркадзь Дзянісевіч гадаць не рызыкуе, каб не сурочыць. Адно вядома ўжо зараз – у электронным выглядзе яна войдзе ў “Віртуальную рэканструкцыю спадчыны Крашэўскага”.

Выстава “Беларусь – яго калыска” ў Брэсцкай абласной бібліятэцы імя М.Горкага стала адной з многіх, што ладзяцца ў гэтыя дні ў розных краінах. Адным гэтым абвяргаюцца сумныя прагнозы Крашэўскага пра тое, што пасля смерці яго адразу ж забудуць.