Трыо з Лунінца і Брэста склалася ў адну каманду выпадкова і, падпёртае двума неслабымі гульцамі з Гомеля і Мінска, зусім дабразычліва  і не менш пэўна перамагала на спартовым пляцы і ў інтэлектуальных гульнях. У каманду “зялёных”  – такі колер нам выпаў –  маглі б трапіць яшчэ  зямлячкі з абласнога цэнтру, але жэрабя расцерусіла трох брэсцкіх удзельніц па другіх камандах.  Ды фотасведчанні не хлусяць – БАЖЫНКІ ім спадабаліся. Бо прайграўшых на фэсце не было. Справа нават не ў тым, што журы старалася зраўняць шанцы. Проста людзі прыехалі на хутар дзядзькі Алеся Лося харошыя.

cms-image-000007386.jpg

Спадар Лось гэтым разам парадаваў этнаграфічнымі кампазіцыямі сваёй капэлы і майстар-класам народнага танца. Маладыя журналісты ўпершыню пабачылі і пачулі беларускую дуду, падобную на ірландскую валынку. На ёй іграў кіраўнік капэлы. Яшчэ былі скрыпачка, гармонік і бубен. Танцавальная навука пайшла не так добра, – сітуацыя апісвалася шахматным тэрмінам “цэйтнот”. “Мала часу” па-нашаму.

cms-image-000007387.jpg

Цудоўныя тры гадзіны ля вогнішча ўжо за поўнач падарыў  удзельнікам БАЖЫНАК адзін з лепшых беларускіх шансанье Аляксандр Памідораў, які па сумяшчальніцтве быў вядучым фэсту. З просьбы літаральна ўзрослых на ягоных  песнях журналістаў маладога веку ён выканаў некалькі шлягераў з “Народнага альбома”.  Пад прагавор, які быў то канферансам,  то адкрытай рагатлівай сцябоцінай, маэстра Памідораў прадставіў таксама песні, якія склалі аснову двух новых альбомаў.  Адзін з іх мае зубаломна-зубаскальскі назоў “Чорныя грушкі пагрому” (яўна перакрыўляючы “Белую яблыню грому” Нескажукаго).  Адну з песень з глабальна-аглабельнай паэтыкай шансанье зымправізаваў з капэлай Алеся Лося.  Нібыта атрымаЛАСЯ.

cms-image-000007388.jpg

ЗастаЛОСЯ нагадаць, што летась берасцейцы, у асноўным дзякуючы чыннаму ўдзелу жураў “Брэсцкай газеты”, таксама былі лаўрэатамі БАЖЫНАК.  Маладыя, трэніруйцеся.  Планка вам пастаўленая ўжо два разы. Падцягвайце цела, і не аддавайце цыгарэтам, алкаголю ды ляноце розум. Жыве гумар як рухавік карпаратыўнага (таксама) прагрэсу!

cms-image-000007389.jpg

Фота аўтара

Яўген Бяласін, Брэст, 04.08.2013

Фота1. Каманда-пераможца з прымкнуўшым да яе катом Базыліё.

Фота 2. Унутраны рэдактар вядзе каманду жоўтых журналістаў (ЖЖ) са сцэны.

Фота 3. Мячом авалодаў юрыст БАЖа Андрэй Бастунец, аўтар адзінага гола ў адказ на сем нашых.

Фота 4.  Этнаграфічныя напевы …

Фота 5. …і танцы пад кіраўніцтвам Алеся Лося.